Papa giunay'g dunggab sa anak

CEBU, Philippines - Usa ka amahan kinsa mipauling hubog sa ilang balay ug nangulata sa iyang asawa ug mga anak, giunay og dunggab   sa usa sa iyang mga anak didto sa sitio Caimito, barangay Sangi, dakbayan sa Toledo sa miaging gabii.

Ang biktima mao si Melchor Tundag, 43, minyo, nga taga Sangi, samtang ang suspetsado mao ra usab ang iyang anak nga si Roel Canete Tundag, 23, ulitawo.

Si SPO3 Carmilito Hornales, desk officer sa Toledo City Police mibutyag sa Banat News  nga ang biktima hubog kaayong nahiabot sa ilang balay human kini makig-inom sa iyang mga barkada.

Sa iyang pag-abot sa balay, giingong nanghagis kini ug nanapat sa iyang asawa ug mga anak hinungdan nga gibadlong sa suspek apan sila na hinoon ang nagkalalis .

Ang suspetsado nga nahutdan na og katarungan mipunit og basiyong botelya, dayong bunal niini sa yuta ug dihang nabuak ug migimaw na ang hait nga bildo niini, giduslak dayon ngadto sa dughan sa biktima.

Dihang samaron na ug mibuhagay na ang daghang dugo mihunong sa pagpangulata ang biktima ngadto sa iyang asawa ug mga anak ug gihatod dayon nila kini ngadto sa Toledo City District Hospital apan gibalhin usab dayon sa tambalanan sa dakbayan sa Sugbo.

Samtang ang suspek boluntaryo usab nga mitahan sa iyang kaugalingon ngadto sa kapolisan ug anaa na siya sa prisohan samtang nagpaabot nga pasakaan siya og kaso sa iyang amahan.  - BANAT NEWS