CEBU, Philippines - Patay nang miabot sa tambalanan ang usa ka Taiwanese doctor human kini atakeha sa kasingkasing sulod sa usa ka gay bar sa Brgy. Mantuyong dakbayan sa Mandaue sa milabay’ng gabii.
Ang giatake mao si Charlie Yu, hingkod, usa ka Taiwanese doctor nga kasamtangang nagpuyo sa Brgy. Tinago dakbayan sa Sugbo.
Matud pa ni Niño Taboada, ang kawani sa gay bar nga pag-abot ni Yu sa maong dapit mi-order kini og usa ka beer.
Pipila ka gutlo sa dihang katunga pa sa botilya ang nahurot niini kalit kining natumba ug miping-it sa kasakit sa dughan hinungdan nga gihatod dayon kini ngadto sa duol nga tambalanan diin didto kini ideklarar nga patay na sa paghiabot.
Hinuon walay nakitang foul play ang kapolisan sa dakbayan sa Mandaue atol sa paghiling sa patay’ng lawas ni Yu.
Samtang gipadayag ni Dr. Joseph Poblacion, usa sa mga doctor sa St. Vincent hospital nga dili maayo sa usa ka masakiton og kasing-kasing ang pag-inom og ilimnong makahubog ilabi na kung beer kay dilikado kini sa kahimtang sa pagpitik sa kasingkasing nga mahimong ikamatay. – WC (BANAT NEWS)