Karneng baboy magnihit

CEBU, Philippines - Gikabalak-an nga masinati dinhi sa Sugbo ug tibuok Central Visayas ang pagnihit sa suplay sa mga karneng baboy karung buwana ug mas mosamot pa kini sa mosunod nga mga bulan.

Mao kini nahipos nga impormasiyon sa Department of Agriculture -7 nga gikan pa sa bulan sa Nobiyembre sa milabay’ng tuig hangtud sa milabay’ng bulan sa Pebrero karung tuiga hinay-hinay nga namatikdan ang pagkulang sa suplay sa mga karneng baboy.

Matud pa ni Grace Dagala, information officer sa DA-7 nga nabalaka silang mosamot pa ang pagkulang sa suplay sa karne karung bulana hangtud na sa bulan sa Hunyo tungod kay pagkakarun mao pay pagsugod og buhi og mga baktin sa mga farm dinhi sa rehiyon.

Nunot niini napanglantawan sa DA-7 nga mosaka og P10 ngadto sa P20 ang kilo sa karneng baboy sa mosunod nga mga adlaw kun mosamot ang pagnihit sa suplay sa karneng baboy.

Gani gika-report nga duna nay mga stalls sa kamerkadohan dinhi sa dakbayan ang dili na regular nga maka-display og karneng baboy matag adlaw tungod sa kakulang sa suplay niini.

Hinuon matud ni Dagala gikinahanglan karun nga matapakan ang gikulangon sa karneng baboy gikan sa Luzon.

Nasayran nga wala kaayo makatagamtam og pagnihit sa suplay sa karneng baboy sa milabay’ng mga bulan ilabi na adtong Disyembre tungod sa kadaghan sa mga imported meat nga gipamaligya nga barato.   (EIM)  (BANAT NEWS)