Oppus nagustohan ni Gwen pagka hepe sa CPPO

CEBU, Philippines - Gibutyag ni Gob. Gwendolyn Garcia nga mas pabor siyang ang himuong direktor sa Cebu Provincial Police Office mao si Sr. Supt. Louie Oppus kinsa mao karon ang kasamtangang officer-in-charge human mo-resign si Sr. Supt. Erson Digal.

Sumala pa ni Garcia kagahapon sa press conference nga mipadala na siya og hangyo kang PNP Director General Raul Bacalzo nga si Oppus maoy ibutang sa CPPO.

Dugang pa ni Garcia nga polisiya na niya kaniadto pa nga itudlong OIC sa CPPO maoy iyang mapilian nga permanenteng direktor.

Apan hangtud karon wala pa siya makadawat og tubag gikan ni Bacalzo kabahin sa iyang hangyo.

Gipasabot hinuon sa gobernadora nga over qualified sa maong posisyon si Oppus.

Si Oppus maoy regional director for operations (DRDO) sa Police Regional Office-7.

Kini nagkahulogan nga si Oppus maoy ikatulong dunay taas nga posisyon sa regional level ug sakop niya ang tanang provincial directors sa tibuok rehiyon-7 ug kandidato na siya pagka-heneral.

Matud pa sa gobernadora nga ang iyang gipangita nga ikahulip ni Digal mao ang competent, may kapasidad pagdumala sa dakong organisasyon ug labaw sa tanan ang kasaligan.( /EIM)    (BANAT NEWS)