CEBU, Philippines - Gihimakak ni Kongresista Eduardo Gullas sa unang distrito sa probinsiya sa Sugbo ang pasangil sa League of Cities of the Philippines nga ang 16 cities mipadala og ‘secret letter’ ngadto sa Korte Suprema.
Ang LCP mipasangil nga ang gibuhat sa 16 cities usa ka ‘unethical’ ug dili unta angayang mopadala og suwat ngadto sa Korte Suprema.
Si Gullas miklarong dili matawag nga ‘secret letter’ ang ilang gipadalang suwat tungod kay gi-file gyud nila kini ngadto sa SC ug ang counsel sa LCP ug ang matag justices gihatagan usab og kopya niini ug gi-take up usab kini sa resolusyon sa Korte.
Ug ang maong suwat wala magkombinsir sa Korte Suprema nga ideklarar ang 16 charters nga mahimong Constitutional kundili igo lang kining nag-awhag sa tulo ka mga justices nga mo-participate sa botasyon.
Sa desisyon sa SC niadtong Nobiyembre 8, 2008 si Justices Consuelo Ynares-Santiago, Dante Tinga ug Antonio Eduardo Nachura wala moapil sa botasyon.
Si Ynares-Santiago niadtong higayona ubos sa lima ka adlaw nga vacation leave samtang si Tinga ug Nachura mi-abstain sa pagbotar.
Niadtong Enero 19, 2009 ang nahisgutang suwat gipadala sa counsel sa 16 cities nga si Estelito Mendoza ngadto sa SC.
Si Gullas maoy nangamahan sa bill sa pagkahimong siyudad sa Carcar ug Naga nga ubos sa iyang distrito. Ang Naga ug Carcar lakip sa 16 ka siyudad nga buot ibalik ngadto sa pagka-munisipyo sa LCP.
Kahinumduman usab nga si Gullas nagkanayon ang hukom sa SC susama sa pendulum sa relo tungod kay atras abante ang desisyon niini.
Sa laing bahin, ang LCP gikatahong miduso sa ilang motion for reconsideration kabahin sa gipagawas nga hukom sa SC sa pag-reinstate sa cityhood sa 16 cities.
“It’s all about the money, the IRA (internal revenue allotment). Like the older siblings would like to kill the younger siblings for the inheritance,” ni Gullas pa.
Si Gullas midugang nga adunay mga siyudad nga sakop sa LCP nga wala gani makatuman sa usa sa mga rekisitos nga P20 milyones nga income dihang gihimo silang siyudad.
Ang tulo mao ang Marawi City nga duna lang kini P5,291,522; Palayan City ug Sipalay City nga duna ray P6 milyones ug P9 milyones nga income sa usa’g-usa. (\EIM) (BANAT NEWS)