Mosyon nga P8 plite wa maduso, LTFRB-7 mag-public hearing

CEBU, Philippines - Giklaro sa Land Transportation Franchising and Regulatory Board (LTFRB-7) nga dili basta ilaha dayung maaksyonan ang mosyon sa mga drayber nga nagtinguhang ipatuman ang P8 nga minimum nga pletihan dinhi sa rehiyon nga maoy orihinal nilang gipangayo sa petisyon.

Si LTFRB-7 regional director Ahmed Cuizon padayon pang nagpaabot sa iduso nga mosyon sa City Transport Cooperative (CITRASCO) nga una nang mipadayag nga mosang-at sa maong petisyon kagahapong adlawa.

Ang orihinal nga petisyon sa CITRASCO mao ang P8 nga minimum nga pletihan apan gihimo lang kining P7.50 isip probational increase sugod niadtong Enero gikan sa P6.50.

Si Ryan Yu, chairman sa Citrasco dihang nahinabi sa Banat News nagkanayon nga ugmang adlawa pa nila maduso ang mosyon inay kagahapong adlawa tungod kay sa paghimo ning balita gi-trabaho pa kini sa ilang abogado.

Gipasabot ni Yu nga mapugos gyud sila pagduso sa maong mosyon tungod kay gisigihan sila og paningil sa ilang mga sakop kabahin sa pending nilang petisyon paghimong P8 sa pletihan.

Kini luyo niining nagpadayong pagsaka sa presyo sa petrolyo ug wala mabatyagi sa mga drayber ug operators ang dugang piso nga usbaw.

Gipadayag hinuon ni Cuizon nga kun madawat nila ang kopya sa mosyon ilaha kining tun-an ug kun masuta ang merito motakda dayun sila og public hearing aron pagsukod sa sentimiyento sa publiko.

Gisugyot ni Cuizon ang lapad nga City Hall grounds sa Plaza Sugbo nga maoy pahigayunan sa public hearing aron daghan ang makatambong sa tanan sama sa mga tinun-an ug mga mamumuo.

Ang makab-ot unyang desisyon maoy ilang irekomendar ngadto sa Manila. (EIM) (BANAT NEWS)