Gobyerno ug komunista wa magkasabot

CEBU, Philippines - Wala pa’y nahitabo sa sabot-sabot tali sa kagamhanan sa Pilipinas ug sa Communist Party of the Philippines- National Democratic Front-New People’s Army (CPP-NDF-NPA)sa nasud sa Norway.

Kini maoy pagtuo ni Senador Antonio Trillanes IV human wala na’y migawas nga balita mahitungod sa sabot-sabot sukad kini gisugdan niadtong Pebrero 15.

“Maybe they are not doing anything yet,” sumala pa ni Trillanes nga nahinabi sa mga tigbalita sa Cebu Internatinal Convention Center niadtong Sabado.

Nakadungog hinuon si Trillanes nga dunay gihimong pag-organisar sa administrative structures sa sabot-sabot.

Kadudahan ang resulta sa sabotsabot human gihilom sa gobiyerno ug sa CPP-NPA ang unsa mang kalamboan samtang nagpadayon ang kalihukan didto sa Norway.

Sayo niini, si Kong. Pastor Alcover, Jr. sa Alliance for Nationalism and Democracy (ANAD) Partylist, kusganong misaway sa sabot-sabot.

Atol sa anibersaryo sa ANAD Partylist niadtong Pebrero 12, mismo si Senador Jinggoy Estrada nga maoy pinasidunggang dinapit ang walay salig sa sabot-sabot.

Gani, matud pa ni Estrada nga ang mga rebelde angayan nga pus-on ug puhagon sama sa gihimo sa iyang amahan nga si kanhi Presidente Joseph Estrada sa pagpakiggubat sa mga rebelde sa Mindanao.

Laing kabalaka mao nga ang posibilidad makig-alyansa ang administrasyon ni Presidenti Benigno Aquino III sa CPP-NPA. - BANAT NEWS