CEBU, Philippines - Gikataw-an lamang ni Gobernador Gwendolyn Garcia ang nanggawas nga report nga ang laing kahulogan sa bag-ong newsletter sa siyudad sa Sugbo nga BARUGG mao ang “Bag-ong Alyansa ni (Cebu City mayor Mike) Rama ug (Gov.) Gwen Garcia Garcia.”
Hinuon wala niya angkona ug wala usab niya ipanghimakak ang maong mga hunahuna sa iyang mga kritiko.
Matud pa sa gobernador nga dili siya angay nga malain sa maong kahulogan kay alang kaniya matag tawo may kaugalingong hunahuna.
Kini tungod kay ang kanunay niyang gilantaw sa iyang pagserbisyo isip pagkagobernador mao man ang paghatag sa tanang kalambuan alang sa publiko ug sa pinalanggang Sugbo.
Sumala pa ni Garcia nga ang iyang administrasyon andam kaayong moabag sa kagamhanan sa siyudad sa Sugbo kun maghisgot na gani og kalamboan sa Sugbo kay siya usa man ka alagad sa katawhan sa Sugbo.
Gipahibawo usab sa gobernador nga nakadawat siya og feedback gikan sa pipila ka mga opisyales lakip na ang mga molupyo sa siyudad sa Sugbo nga gusto silang mahibalik ang maayong relasyon sa mga opisyales sa siyudad ug probinsiya sa Sugbo kay mas daghan ang mahimong mga kalambuan ug mas epektibo usab ang serbisyo publiko.
Dugang pa sa gobernador nga nagtuo siya nga daghan og makab-ot nga kaayohan ang kagamhanan dinhi sa Sugbo kun ang city hall ug ang Kapitolyo magkahiusa padulong sa dalan sa kaayohan sa Sugbo. - BANAT NEWS