Mananagat sa Talisay gisikop sa Cordova

CEBU, Philippines - Gidakop sa mga sakop sa Bantay Dagat sa Cordova ang duha ka mananagat nga taga sitio Salvador sa barangay Tangke sa dakbayan sa Talisay kay namukot sila sa kadagatan sa isla sa Hilutongan sa maong lungsod.

Ang mga nadakpan mao sila si Henry Reyes, 43, ug Jessie James Redonia, 17 , nga pulos taga Tangke.

Si PO3 Rolando Tagsip sa kapolisan sa maong lungsod miingon nga nagpatrolya sa kadagatan sa Cordova ang grupo ni PO2 Charlie Valmoria , kauban sa mga sakop sa Bantay Dagat sa Cordova nga sila si Wendel Ugsang, Allan Buenaflor, Edmund Macabodbod ug Lorgie Piamonte

Sa ilang pagtadlas sa kadagatan sa barangay Hilutungan ilang nasigpatan ang duha ka mananagat nga nanaktak sa pukot.

Busa gisakmit dayon kini nila ni PO2 Valmoria ug mga kauban ug gidakop ang duha ka mananagat ug ilang gihatod sa police station sa maong lungsod.

Gawas sa pukot lakip nga gisakmit sa mga otoridad sa balaod ang duha ka kilong isda nga ilang kuha.

Ang duha temporaryong gibalhog sa Cordova Police Detention Cell   ug human makabayad og multa gibuhian dayon kini sa kapolisan. (BANAT NEWS)