Koreano gilabniha'g bag

CEBU, Philippines - Gibanabanang dul-an sa P100 mil ang nasakiyo sa kawatan nga milabni sa bag sa usa ka Koreano sulod sa usa ka PUJ didto sa Brgy. Agus dakbayan sa Lapulapu sa milabay’ng gabii.

Ang biktima mao si Iek Jin Jung, 30, ulitawo, usa ka Korean national ug kasamtangang nagpuyo sa usa ka resort sa Sitio Soong Brgy. Mactan dakbayan sa Lapulapu.

Si Jung mibutyag sa kapolisan nga nagsakay siya sa PUJ gikan sa Agus padung na unta siyang mouli kauban sa laing Koreano dihang may pasaherong nanaog sa jeep

Apan dihang miaksiyon na og abante ang PUJ usa ka lalaki nga nagbarog sa daplin sa dalan kalit nga milabni sa bag sa biktima dayong dagan niini pahilayo sa maong dapit.

Wala na gukda sa Koreano ang kawatan ug midiretso nalang siya pag-adto sa buhatan sa kapolisan sa dakbayan sa Lapulapu.

Nadala sa maong snatcher mao ang usa ka digital camera nga nagkantidad og P75 mil , i-pod MP3, $70 ug P2 mil cash nga ang tanan didto sa sulod sa bag.

Gipakita si Jung sa mga hulagway sa gallery sa mga bangiitang snatcher apan pakyas usab kini sa pag-ila sa mibiktima kaniya gumikan kay ngitngit ug wala niya maklaro ang dagway sa manglabnihay. (BANAT NEWS)