T. Padilla naigo na usab og sunog, gi-charge nga cellphone gidudahan

CEBU, Philippines - Miulbo na usab ang sunog sa sitio Freedom, barangay T. Padilla ning dakbayan kagahapon sa hapon pasado alas 3 diin mao kini ang ikatulong sunog karung buwan sa Marso ang fire prevention month.

Ang maong sunog giisa ngadto sa 2nd alarm ug nakontrolar kini sulod lang sa 30 minutos. Ang sitio Freedom maoy usa sa lima ka sitio nga naigo sa dakong sunog sa T. Padilla sa maong lugar.

Sa pakighinabi sa Banat News ni SFO1 Nilo Daculan sa Cebu City Fire Department mibutyag kini nga ang maong sunog base sa alegasyon naggikan sa usa ka boarding house nga gipanag-iya ni Celso Sansub.

Matud pa ni Daculan nga diha sa 2nd floor sa maong boarding house nagsugod ang kalayo partikular na sa lawak sa usa sa mga boarders nga giila sa ngalan nga Gingging.

Midugang si Daculan nga base sa pamahayag sa usa sa mga boarders nga misaka sa 2nd floor sa wala pa mahitabo ang insidente, aduna kini nadungog nga cellphone nga nagpunay og tingog.

Hinungdan nga wala mawala sa pagduda ni Daculan nga posibleng naka-charge ang cellphone ug mi-overheat kini apan ila pa usab kini nga susihon ang maong alegasyon gikan sa usa ka boarder.

Misaysay usab si Daculan nga tungod kay mixed material ang boarding house dali ra kining gilamoy sa kalayo ug daling mikatap sa kasikbit nga residential house nga tapad lang sa maong boarding house.

Samtang nalakip usab og kasunog ug nadanyos ang 4-door apartment nga gipanag-iya ni Francisco Alonzo nga pulos okupado ug gihimong mga tindahan.

Matud pa ni Daculan gibana-banang mokabat sa P350 mil ang nadanyos sa maong hitabo ug walay gikareport nga naangol o nakalas sa maong insidente.

Ang kabomberuhan nagpasidaan ning bulana sa pagsaulog sa fire prevention month nga mao ang bulan diin taas kaayo ang temperature sa klima ug daling mokatap ang kalayo. (BANAT NEWS)