P8 nga minimum fare giduso

CEBU, Philippines - Kapin pa usa ka buwan human pormal nga giaprubahan ang dugang piso nga umento sa pletihan sa pampublikong sakyanan dinhi sa Central Visayas, subli na usab karun nga mangayo og dugang umento sa pletihan ang mga drayber.

Si Ryan Yu, Chairman sa City Transport Cooperative (Citrasco) mipadayag nga ugmang adlawa (Lunes) moduso sila og mosyon sa Land Transportation Franchising and Regulatory Board (LTFRB) aron ipabalik sa P8 ang minimum nga pletihan.

Gipasabot ni Yu nga sa pagkakarun ang probational increase nga piso lang giaprobahan nga usbaw sa minimum nga pletihan hinungdan nga nahimo na karung P7.50 gikan sa P6.50.

Matud pang Yu dili na bag-o ang P8 nga ilang gipangayo sa minimum nga pletihan sanglit mao kini ang orihinal nilang gipangayo sa wala pa ipatuman ang P7.50.

Dugang ni Yu nga wala matagamtami sa mga drayber ang dugang kita sa pagpatuman sa P7.50 nga usbaw sa minimum nga pletihan tungod kay gikaon lang usab kini sa sunodsunod nga umento sa presyo sa lana.

Gani nagkanayon si Yu nga duna nay mga drayber sa pampublikong sakyanan ang miundang na sa ilang pagpamasahero ug nangita nalang og laing kapanginabuhian tungod kay kanunay na silang alkanse sa ilang kita.

Si Rolan kinsa mihangyong dili lang hinganlan ug drayber sa Banawa-Colon nga nahinabi sa Banat News mitug-an nga kasagaran sa mga pasahero mohatag lang og P7 sa ilang pleti ug dili sila moreklamo niini sanglit wala usab silay tag 25 sentimos nga ikasukli kung mohatag og P8 ang ilang pasahero.

Apan base sa obserbasyon sa Banat News, ang mga drayber bisan og pletihan og P7.50 panagoan lang ang tag 25 sentimos ug kung dunay mopleti og P8 dili na nila suklian bisan paman naa na silay ikasukli.

Gihulagway kini sa mga pasahero nga susama lang og pagpanikas o pagpangawat, bisan ang mga estudyante ug senior citizen nga mopleti og P7 dili gihapon ibalik ang piso.

Niining bag-o lang misaka na sab og laing peso ang matag litro sa gasolina ug krudo nga ikaduha nang pagsaka karun lang semanaha.

Ang mga oil players nangangkong bunga kini sa pagnihit sa suplay sa lana tungod sa kagubot karon sa nasud sa Libya nga usa sa mga oil producers sa kalibutan.   (EIM) (BANAT NEWS)