OFWs gikan sa Libya may P10mil sa OWWA
CEBU, Philippines - Adunay giandam nga cash assistance ug tabang aron makatrabaho dinhi sa nasud alang sa mga Overseas Filipino Workers (OFW) gikan sa Libya matud pa sa Overseas Worker Welfare Administration (OWWA)-7.
Si Rey Jacalan, officer-in-charge Program and Services Division sa OWWA-7 mibutyag sa Banat News nga sa ulahing talaan nila niadtong milabay’ng adlaw lima ka mga OFW nga taga Bohol, dakbayan sa Sugbo ug Lapu-Lapu ang nakauli na gikan sa maong nasud.
Matud niya nga sobra sa 26,000 ang mga OFW nga miadto sa Libya ug sa ulahing impormasyon nga ilahang nadawat sobra na sa 3,000 ka mga Filipino ang nakagawas na sa Libya.
Gibutyag ni Jacalan nga 305 lang ka mga OFW sa Libya ang gikan dinhi sa Region 7.Sa ulahing talaan sa Department of Labor and Employment (DOLE) mikabat ngadto sa 104 ka mga OFWs ang na-repatriated gikan sa Libya nga nagtrabaho sa usa lamang ka kompanya.
Apan pipila sa mga kabanay ug ang mismong mga OFWs nga naipit sa Libya ang misaway sa kahaguka sa gobiyerno sa ilang aksyon pagpabakwit sa mga OFWs.
Si Jacalan mihimakak niini ug miingon nga ang kagamhanan wala magkuwang sa paghatag og tabang kanila.
Ang Department of Foreign Affairs mi-charter na og barko nga mohakot sa mga OFWs gikan sa Bengazi, Libya ngadto na sa Greece o sa ubang nasud nga walay gubot ug gikan didto pasakyon sila og commercial flights pabalik sa nasud.
Si Labor and Employment Secretary Rosalinda Dimapilis-Baldoz miluwat og kamanduan nga hatagan og dinaliang tabang ang mga OFW nga namauli nganhi sa nasud tungod sa nahitabong kagubot ngadto sa Middle East.
Samtang si OWWA administrator Carmelita Dimzon miluwat og guidelines alang sa provision sa P10,000 nga financial relief assistance alang sa nahisgutang mga OFW. - BANAT NEWS
- Latest
- Trending
