CEBU, Philippines - Nautingkay kagahapon sa hapon ang mga tripulante ug trabahante sa usa ka fast craft vessel human kalit lang kining misilaob pasado alas 4 sa Pier 3.
Ang Kingswell II nga magbiyahian og Cebu ngadto sa Tubigon nga gipanag-iya ni George Tan kalit lang nasunog sumala pang Cebu City fire investigator SFO1 Nilo Daculan nga nahinabi sa Banat News.
Ang alarma nahitabo alas 4:18 ug nakontrolar kini nila sulod lang sa 14 minutos human magtinabangay ang mga tripulante ug trabahante sa maong barko ug bombero pagpawong niini.
Si Daculan nagkanayon base sa pasiunang impormasyon nagsugod sa ubos nga bahin ang kalayo. Giingong kasamtangan nga giayo ang maong barko ug gituohang posibleng ang nalagpot nga agipo sa pag-welding napunta sa foam sa lingkuranan ug nasunog. (BANAT NEWS)