2 Port police gidakop

CEBU, Philippines - Duha ka port police ang nadakpan ug gitanggong sa detention cell sa Cebu City Police Office (CCPO) human pasanginling namusil tungod sa kahubog ngadto sa usa ka 23-anyos nga lalaki.

Ang pagpamusil nahitabo sa usa ka bilyaran sa sitio Silangan II sa barangay Tejero siyudad sa Sugbu kagahapon sa alas-3 sa kaadlawon diin usa ka Freddie Bart Fulache, 23, nagpuyo diha sa nahisgutang lugar ang napusilan sa walang bukton.

Ang duha ka port police nga gidakop mao sila si Insp. Bernard Laquiete, 29, ug Insp. Adolfo Abregana Jr., 36, pulos nadestino sa Cebu Port Authority (CPA).

Ang duha gidakop sa mga sakop sa Mobile Patrol Group (MPG) nga sila si PO3 Edwin Mayuela ug PO2 Erwin Piquero ug gi-turnover ngadto sa Homicide Section nga gipangulohan sa grupo ni PO3 Geoffrey Gutual.

Nakuha kang Laquite ang usa ka Glock 17 nga armas, usa ka Glock 9mm magazine ug 12 ka buhing bala sa 9mm samtang duha ka deformed slugs ug duha ka empty shells sa 9mm sa crime scene.

Ang biktima mipasangil nga kalit silang giduol sa duha samtang sila nagduwa og bilyar ug gipangutana kabahin sa nahitabong snatching sa Pier 3 sa asawa ni Laquite, apan dihang ilang gibalibaran nasuko ang duha ug gibukbok si Fulache.

Tungod niini misukol si Fulache apan kalit siyang gipusil diha sa walang bukton. Ang biktima gidala sa Cebu City Medical Center (CCMC) samtang ang maong mga polis nadakpan.

“Allegedly hubog kuno ang duha unya nangutana kinsa ‘nakaigo’ sa iyang asawa diha sa pier, gitubag nga wala makahibawo nasuko ug nanagpa,” matud pang Gutual nga nahinabi sa mga tigbalita.

Sila si Laquite ug Abregana  nagdumili paghatag og komento sulod sa detention cell sa CCPO dihang gisuwayan pagkuha ilang habig sa mga sakop sa media. (BANAT NEWS)