Maestra gisagpa sa Indian

CEBU, Philippines - Usa ka magtutudlo ang mireklamong gisagpa sa usa ka Indian national diha sulod sa opisina sa ilang prinsipal sa Tabunok Central School sa barangay Tabunok dakbayan sa Talisay niadtong Miyerkules sa hapon.

Ang biktima mao si Jocelyn Medado, 34, taga barangay San Isidro sa nahisgutang siyudad ug nagtudlo sa maong tunghaan samtang ang iyang gireklamo mao si Mohammed Singh alyas “JR” nga temporaryong nagpuyo diha sa barangay Cansojong sa nahisgutang dakbayan.

Sa imbestigasyon sa kapolisan, samtang nagtudlo si Medado gipatawag kini ngadto sa buhatan sa ilang prinsipal diin ang suspetsado naghuwat.

Pag-abot ni Medado giingong gikomprontase kini ni Singh tungod sa utang ug walay daghang pasumangil kalit nga gisagpa ang maong maestra dayong buhi og pulong sa pag-ingon “quits” nga daw nagpasabot ‘tabla na ta.”

Si Medado mitug-an nga niadtong milabay’ng bulan gihulga siya sa maong langyaw maong iyaha kining gisumbong sa mga polis.

Sa laing bahin, si Ralph Medado, 37, taga barangay San Isidro ug paryente ni Jocelyn mi-report usab ngadto sa mga polis niadtong Miyerkules sa hapon nga mga alas 7:30 niadtong Disyembre 30 sa milabay’ng tuig nga gipadalhan siya og text ni Singh nga nagkanayon “hanggang bukas ka na lang.”

Dayon gisundan kini og tawag gikan sa maong langyaw nga naghulga kaniya, matud pa ni Ralph nga adunay utang ang iyang inahan sa maong Indian. (EIM) (BANAT NEWS)