'Tulisang' miigo sa usa ka kolektor napusilan

CEBU, Philippines - Napusilan sa mga polis atol sa gipahigayong hot pursuit operation ang usa sa tulo ka mga tulisan nga nakabiktima og lending collector sa barangay Inuboran siyudad sa Naga niadtong Martes sa ala 1:00 sa hapon.

Ang napusilan sa tuong bahin sa tiil mao si Joseph Mesa Abalo, taga lungsod sa San Fernando, samtang ang iyang laing kauban nga nakaeskapo mao si Renante Riza Villarta ug ang kauban niini nga wala makuha ang pangalan.

Matud ni PO3 Bernard Otida, desk officer sa Naga Police dihang nahinabi sa Banat News miingon nga ang mga suspek positibong gitumbok sa usa ka lending collector nga si Charlene Gentapa, nga maoy mitulis kaniya diha sa barangay Lanas ug gikuha ang P30 mil ug P16 mil nga balor sa mga alahas.

Si Gentapa gipakitaan sa mga hulagway sa mga notadong tulisan sa maong siyudad miila sa maong mga suspek hinungdan nga gilusad dayon ang hot pursuit operation.

Ang tulo nasigpatan sa barangay Inoburan apan giingong misuway og sukol samtang nagsakay og duha ka motorsiklo hinungdan nga napusilan sa tiil ang usa kanila ni PO1 Rommel Patalingjug. Pagkaigo ni Abalo mihunong ang motorsiklo ug nag-iyahay sila og panagan apan nabiyaan ang samaran hinungdan nga nadakpan. (BANAT NEWS)