CEBU, Philippines - Naalarma ang mga residente duol sa taytayan sa dalan B. Rodriguez sa dihang usa ka lalaki ang milayat sa gibanabanang 20 ka tiil nga gilawmon gikan sa ibabaw ngadto sa naugang sapa kagahapon sa alas-2 sa kaadlawon.
Nalandig sa tambalanan si Alberto Sinco, 55, giingong usa ka mahuyang ug nagpuyo diha sa V. Rama Avenue sa barangay Guadalupe siyudad sa Sugbu.
Si Sinco daling gitabang ug gidala sa Cebu City Medical Center (CCMC) sa mga sakop sa Emergency Rescue Unit Foundation (ERUF) human mapalgi sa mga tawo nga nagluko ug nagping-it sa kasakit sa iyang tiil.
Segun sa report, nga sa wala pa moambak si Sinco nakit-an pa kining naglakaw-lakaw diha sa nahisgutang lugar.
Padayon pang gisusi sa kapulisan sa Fuente kun nganong buot magpakamatay si Sinco apan sa report sa Buena Mano Balita sa GMA-7 kini miingon nga tungod sa iyang ‘problema’ nga duna siyay gihambing sakit.
Ang maong pamahayag gidasonan ni Virgilio ang igsuon sa miambak kinsa maoy kanunay mobisita sa gipuy-an ni Sinco dihang ang naulahi mipadayag nga duna kini sakit apan wala hinuon hinganli niini.
Si SPO1 Agustin Collano sa Fuente Police Station nagkanayon nga duna silay nahipos nga impormasyon nga sa wala pa moambak si Sinco nakit-an kining naghingos og rugby diha sa nahisgutang lugar
Si Lyndon Jagmoc, kagawad sa barangay Sambag 2 miingon nga ilang pahugtan ang seguridad diha sa maong taytayan aron dili na mausban ang maong hitabo. (BANAT NEWS)