Ulitawo gipusil patay sa kaila

CEBU, Philippines -  Patay diha- diha ang usa ka ulitawo human pusila sa iyang kaila   samtang nag-estoryahay ug iyang hinigugma sa gawas sa ilang balay didto sa Sityo Kamalig barangay Bato siyudad sa Danao niadtong Lunes sa gabii.

Ang biktima mao si Nonilo Castro Ruelo Jr., 28 anyos, ulitawo, nagpuyo sa nahisgutang lugar, samtang ang suspek giila lang nga si Jojo uban sa usa ka wala hiilhing kauban niini.

Si SPO1 Ildefonso Prosia, desk officer sa Danao City Police mibutyag sa Banat News nga nag-estoryahay ang biktima ug ang hinigugma niini dihang miabot ang suspek nga nag-angkas sa motorsiklo nga gimaneho sa kauban niini.

Nanaog kini ug miduol ngadto sa biktima ug walay daghang estorya, giluthang dayon ang tangkugo sa naulahi ug dihang nahagba kini, mibalik og angkas ang kriminal sa motorsiklo dayon pahilayo sa maong lugar.

Ang kapolisan padayon pang miimbestigar sa maong kaso ug gisuta kun unsay hinungdan sa maong pagpamusil (BANAT NEWS)