Way pagpanagit sa Toledo

CEBU, Philippines -  Wala pay ginikanang nawad-an og anak nga midangop sa Toledo Police Station sukad niadtong milabay’ng Lunes sa buntag diha sa barangay Talavera sa maong lungsod.

Si Chief Insp. Jovito Canlapan nagkanayon nga ang tanang 126 ka mga batang absent sa Talavera Elementary School naa ra sa ilang mga balay hinuon kini miingon padayon ang ilang pakisusi sa maong report.

Si Sr. Supt. Louie Oppus ang OIC sa Cebu Provincial Police Office nagkanayon nga dunay negatibong epekto sa mga tinun-an sa elementarya ang mga susamang report nga ang resulta mangundang sa pagtungha tungod sa kahadlok.

Samtang padayon pang gikompirmar sa kapolisan sa Toledo ang gisignit nga bata, lain na usab nga batang babaye ang gikatahong gisuwayan unta sa pagsignit sa mga nagsakay sa itom nga sports utility vehicle sa barangay road sa bukirang bahin sa sitio Hinognawan barangay Lipanto sa lungsod sa Alegria niadtong Lunes sa alas 10:00 sa buntag.

Apan swerte kay daling nakapangayo og panabang ang apohan nga maoy nag-agak sa biktima ug nakapa-alarma sa mga tawo sa maong lugar hinungdan nga daling misibat ang maong sakyanan.

Matud pa ni SPO3 Rutillo Cardona sa Alegria Police Station dihang nahinabi sa Banat News alas 4:00 na sa hapon mitawag sa ilang buhatan ang kapitan sa barangay nga si Juan Miguel ug mipahibawo sa gikatahong suway nga kidnapping nga nahitabo sa maong lugar.

`Padayon karon ang Womens Desk nga si PO3 Geraldine Capangpangan sa pagsusi sa maong taho apan nunot sa maong hitabo gipatrolyahan na og apil sa kapolisan ang mga tunghaan.