Kabanay sa NZ nurses way balita kanila

CEBU, Philippines - Gipatak-om sa mga awtoridad sa nasud sa New Zealand ang kabanay dinhi sa Pilipinas sa mga biktima sa linog labot sa mga kasayuran human sa maong insidenti.

Matud pa ni Gil Nazareno, uyoan sa usa sa mga biktima nga si Ezra Mae Medalle nga taga dakbayan sa Danao nga ang impormasyon sa mga awtoridad sa maong nasud ang ila karong gisaligan.

Kini human wala sila’y mapaabot nga kalamboan gikan sa Embahada sa Pilipinas sa New Zealand. “Not negative, not positive,” sumala pa ni Nazareno sa dihang gipangutana kung unsa ang kahimtang sa ilang kabanay nga tua karon sa maong nasud.

Matud pa ni Nazareno nga ang uyab ni Medalle nga si Jessie Redoble kansang inahan toa usab sa Christchurch, New Zealand nanimuyo ang nakapahibalo kanila nga natabunan sila sa pagkahugno sa edipisyo nga ilang gitrabahoan.

Usa pa lang ka semana silang nahiabot sa New Zealand kauban sa lain pang upat nga Sugbuanon nga sila Kristofer Chua, Emmabelle Anoba, Rhea Mae Sumalpong ug Ivy Cabonillas samtang ilang kauban nga si Jewel Francisco taga Cavite. - (BANAT NEWS)