Socialized Housing sa Mandaue ipatuman
CEBU, Philippines - Gihugpong na ang mga nagpuyo sa mga sapa, kanal ug uban pang kuyaw nga mga lugar aron mahimong benepisyaryo sa socialized housing program sa kagamhanan sa dakbayan sa Mandaue.
Ang pangulo sa Housing on Urban Development Office (HUDO) nga si Emmanuel Arong miingon nga ang maong mga molupyo maoy isiguro sa listahan sa mga tawong hatagan og kapuy-an sa gobyerno sa dakbayan.
Si Mayor Jonas Cortes miingon nga kadtong gipapahawa sa kagamhanan gikan sa tampi sa sapa maoy makapahimulos sa programa sa pagpabalay sa mga walay kapuy-an.
Sa pagkakaron gihimo na sa kagamhanan sa dakbayan ang negosasyon tali sa tag-iya sa luna sa barangay Paknaan nga maoy tarokan sa socialized housing sa dakbayan.
Si Cortes miingon andam ang kagamhanan nga mohatag sa P12,000 nga tabang pinansiyal ngadto sa mga gihinginlan sa kagamhanan.
Hinuon ang maong kantidad dili madawat personal sa benepisyaro kundi magsilbi kining equity nila sa ilang mahimong utang ngadto sa kagamhanan. (BANAT NEWS)
- Latest
- Trending
