Carreta vendors di manimalos

CEBU, Philippines - Gihimakak sa mga lumolupyo ug manindahay diha sa Carreta Cemetery ang pasangil nga plano nilang mobawos o magmugna og kagubot batok sa mga nagbantay diha sa maong sam-ang human sa pagkamatay sa usa nila ka kauban niadtong miaging Biyernes.

Kahinumduman nga napuno sa tensiyon karon ang maong sam-ang human sa nahitabong pagpusil patay sa usa ka gwardiya nga si Graciano Sandoval gamit ang usa ka shotgun ngadto ni Jeffrey Paz, usa sa mga nahibiling residente sa maong sam-ang.

Sa pakighinabi sa Banat News, si Rolando Bello, ama-ama sa biktima mihimakak sa unang pamahayag ni Sandoval nga hubog nga namugos pagsulod sa gate ug nangilog og pusil si Paz maong napusilan kini.

Si Bello nagkanayon nga dili tinuod ang mga taho nga mobawos tungod sa kamatayon ni Paz ngadto sa mga magbantay dinha sa sam-ang.

Niadtong Sabado, gi-pull out na sa Cebu Metropolitan Cathedral ang mga gwardiya ug mihangyo sa kapolisan nga mao nay mobantay sa maong dapit tungod sa tensyon.

Gihangop hinuon kini sa mga vendors samtang si Bello nanawagan nga mahatagan og hustisya ang kamatayon ni Paz.

Giklaro usab sa mga kabanay ni Paz nga wala pa silay bisag piso nga hinabang nga nadawat gikan sa Cathedral o sa Alesna Security and Detective Agency (ASDA) ang agency nga nagkupot ni Sandoval.

Sa laing bahin, nangayo og laing diyalogo ang mga vendors ngadto sa kadagkuan sa Cathedral ug ni Archbishop Jose Palma sa panghinaot nga tugutan silang makapaninda sa maong sam-ang nga maoy ilang panginabuhian. (BANAT NEWS)