CEBU, Philippines - Gusto sa kagamhanan sa Consolacion nga hiusahon ang puwersa sa traffic enforcer sa maong lungsod ug sa Liloan aron labing maatiman ang dagan sa trapiko sa duha ka managsilingang lungsod sa amihanan.
Si Mayor Teresa Alegado sa Consolacion miingon nga mahinungdanon kaayo nga adunay koordinasyon ang mga traffic enforcer sa lungsod sa Consolacion ug sa Lilioan aron mapitol ang mga abusador nga drayber.
Kasagarang abuso sa drayber mao ang pagpatuyang og padagan sa ilang mga sakyanan nga delikado kaayo sa mga pasahero ug bisan sa mga katawhang anaa sa karsada.
Apan kun mabantayan pag-ayo sa mga tigpatuman sa trapiko ang maong matang sa pangabuso, masanta dayon kini ug dili maghatag kuyaw sa kinabuhi sa ilang mga pasahero ug sa katawhan nga anaa sa kadaplinan sa karsada.
Ang drayber nga kusog kaayo mopadagan, wala nay siguro kun luwas ba siya ug ang mga pasahero kun madisgrasya.
Ang mga drayber usab nga abusador nga mopadagan sa ilang sakyanang inabangan, kasagaran mga adis-adis ug dili na mamati og tambag bisan sa ilang mga pasahero kay ang naghari sa ilang utok mao ang binuang.
Matud ni Alegado nga gikinahanlang ipatuman gyud nga higpit ang mga balaod sa trapiko aron mapitol kadtong mga drayber nga abusado.
Gani gipalapdan gyud ni Mayor Alegado ang dalan sa North Coastal Road nga nanukad sa dakbayan sa Mandaue ug mitadlas sa Consolacion ug Liloan.
Ang maong proyekto sa pagpalapad sa karsada sa maong lugar gigahinan og P379 milyones. - BANAT NEWS