Bombero nangandam sa kasaulogan

CEBU, Philippines - Ang Bureau of Fire Prevention (BFP) 7 nangandam na sa pagsaulog sa Fire Prevention Month sugod sa Marso 1 hangtod Marso 31 niining tuiga.

Ang mga pahimangno ngadto sa katawhan aron paglikay sa sunog, maoy usa sa hatagan og gibug-aton sa kabomberohan aron iduyog sa tema nga “Kahandaan sa Sunog Tungo sa Kaunlaran.”

Si Chief Inspector Rogelio Bongabong, Mandaue City fire marshal mibutyag sa Banat News nga buksan nila ang kalihokan sayo sa buntag sa Marso 1 pinaagi sa pagpahigayon og Balaang Misa ug sundan sa pagpaserbato sa siren sa ilang mga fire truck nga padaganon libot sa dakbayan.

Matud pa niya nga sa maong adlaw mangapud-apod usab sila og mga kasayuran unsaon paglikay sa sunog.

Dugang pa niya nga mohimo usab sila og mga pagbansay-bansay unsaon pagpawong ang kayo kun may alarmang motumaw.  - BANAT NEWS