CEBU, Philippines - Usa ka ulitawo kinsa migawas sa ilang balay giluthang angol sa wala hiilhing kriminal didto sa sitio Lub-ang, barangay Casuntingan, dakbayan sa Mandaue sa miaging kaadlawon.
Ang biktima nailhang si Junrey Onio Narceso, 19, ulitawo nga molupyo sa maong dapit, samtang ang kauban sa kriminal nga miluthang kaniya maoy nasikop ug nailhang si Almer Joseph Catayong, 29, ulitawo, nga lumad nga taga Eastern Samar, apan kasamtangang nagpuyo sa barangay Pagsabungan sa Mandaue.
Si PO1 Clipton Manugura sa kapolisan sa Presinto 4 sa Casuntingan Police Station mibutyag nga migawas sa ilang balay ang biktima sa alas 2:00 sa kaadlawon , dihang kalit nga mitungha ang kriminal ug giluthang ang buko-buko sa biktima.
Misibat dayon ang kriminal, apan ang kauban niyang si Catayong maoy nasikop sa mga otoridad.
Gihatod dayon ang biktima ngadto sa Vicente Sotto Memorial Medical Center sa dakbayan sa Sugbo.
Samtang gisuta pa sa kapolisan unsay atraso sa biktima ug sa kriminal, ug ang dinakpan nagpahayahay na sa prisohan. - BANAT NEWS