Reklamo sa dealer og manok gikataw-an ni utlang

CEBU, Philippines - Igo lang nga gikataw-an sa hepe sa Department of Veterinary Medicine and Fisheries nga si Dr. Alice Utlang ang pasangil sa usa ka market vendor nga gi-harass pinaagi sa pagsakmit sa iyang mga baligyang manok sa DVMF.

Sumala pa ni Utlang nga usa ka badlungong mamaligyaay og manok ni Estella Acbayan gumikan kay pila na ka higayon nga nakasupak kini sa mga balaod sa saktong pag-preprarar sa karneng manok.

Ang maong market vendor nagpadala og suwat ngadto sa konseho aron ipadangat ang iyang reklamo batok sa mga sakop sa DVMF pinangulohan ni Utlang.

Kini tungod sa giingong pagpangsakmit sa maong ahensya sa iyang mga baligyang manok.

“Kana man gud si Acbayan, daghan na kaayo nga nagreklamo ana kay mosupak gyud sa balaod. Igo raman ta motuman sa balaod, nganong moana man siya nga ato siya nga gi-harass,” sumala pa ni Utlang.

Nagkanayon si Utlang nga gipahunong sa iyang mga tawo ang delivery van ni Acbayan nga dunay karga nga 3,350 ka dressed chicken gumikan kay dunay pinapasan ang permit niini ug wala pu’y klaro ang sudlanan sa mga karne.

Nagkanayon si Utlang nga daghan na sila og nadawat nga report sa gipangbuhat ni Acbayan ug igo ra miaksyon ang iyang departamento.

“Kung dunay madawat nga tawag, mohimo dayon mi og operasyon, unsa ma’y dautan ana?,” dugang pa ni Utlang.

Samtang si Dr. Pilar Romero ang hepe sa Public Health Division sa DVMF midason usab sa pamahayag ni Utlang batok ni Acbayan. Matud pa niya nga dili kini motambong sa mga seminar sa saktong paglimpiyo sa mga karne.

Dugang pa niya nga duna siya’y tawo karon nga nagpa-blotter human nakadawat og hulga gikan kang Acbayan.

Gisuwayan og tawag sa Banat News si Acbayan sa iyang cellphone aron makuhaan sa iyang habig apan igo rang mikiring ug napawong ug dihang giusban dili na kini makontak. - BANAT NEWS