Nalupig sukmagay mi-'resbak' laing tawo napatay

CEBU, Philippines - Usa patay sa nahitabong karambola sulod sa videokihan sa nahitabong kagubot sa videokihan sa lungsod sa Carmen.

Patay ang usa ka 30-anyos nga lalaki human kini dunggaba sa usa ka 17-anyos kansang mga igsuon mi-‘resbak’ aron bawsan ang tawong misukmag sa suspek diha sa usa ka videoke house sa barangay Fuente sa lungsod sa Carmen niadtong Sabado sa kaadlawon.

Ang biktima giila sa mga polis nga si Adonis Bejoc, residente sa nahisgutang dapit kinsa nakaangkon og upat ka mga samad dinunggaban sa lawas daling gidala ngadto sa Danao District Hospital apan wala na kini makaabot nga buhi sa nahisgutang tambalanan.

Ang 17-anyos nga suspek boluntaryong misurender ngadto sa mga polis ug nadetiner karon sa Carmen Police Station.

Base sa imbestigasyon sa mga polis nga ang menor uban sa iyang duha ka mga igsuon sulod sa videoke house ug nag-inom dihang kalit nga mibarog ang suspek nga pwerteng huboga ug nanghagad og sinukmagay ngadto sa mga kostumer.

Usa sa mga kustomer nga giilang si Bryan Florenosos nasuko ug gisukmag ang menor nga miresulta sa ilang sinukmagay.

Ang menor kinsa gilupig ni Florenosos midagan pauli ngadto sa ilang balay nagkuha og kutsilyo uban sa iyang mga igsuon ug namalik bitbit ang 17 pulgadas nga kutsilyo apan wala na nila maabti si Florenosos tungod kay nakabiya na kini.

Sa kalagot sa suspek gipahimungtan niini ang biktimang si Bejoc kinsa naglakaw lang niadtong tungora duol sa gikahimutangan sa suspek ug gidunggab kini makadaghang higayon.

Ang menor misurender ngadto sa mga polis samtang ang duha niya ka mga igsuon miikyas ug padayon pa kining gipangita. - Brenda Batuto ug Ria Mae Booc sa The Freeman  (BANAT NEWS)