CEBU, Philippines - Dakung kantidad sa salapi nga gi-withdraw gikan sa bangko sa usa ka batan-ong dalaga nga gamiton alang sa pagpatambal sa nagmasakiton niyang amahan ang kalit lang gilabni sa duha ka lalaki nga nagsakay og motorsiklo kinsa kalit lang misakdap kaniya.
Ang paglabni nahitabo ala una pasado ang takna sa hapon niadtong miaging adlaw sa dalan A. del Rosario sa barangay Centro sa dakbayan sa Mandaue.
Ang biktima mao si Lundie Abong, 23-anyos, lumad nga taga dakbayan sa Toledo ug kawani sa usa ka coffee shop sa dakbayan sa Sugbo.
Si PO3 Nersas Baay sa kapolisan sa Presinto 1 sa Centro Police Station nga nahinabi sa Banat News miingon gikan pa nga nag-withdraw ang biktima og salapi nga nagkantidad og P10,000 gikan sa ATM niini sa Philippine National Bank (PNB) sa dalan A. del Rosario sa Centro, Mandaue City Branch.
Matud ni SPO3 Baay nga naglakaw ang biktima gikan sa bangko ug kalit lang kining naigking dihang gisakdapan sa duha ka wala hiilhing mga lalaki nga nagsakay og motorsiklo ug gilabni ang shoulder bag niini.
Sulod sa shoulder bag sa biktima ang iyang salapi nga mokabat sa P12,000, cellphone nga nagkantidad og P10,000 ug pipila ka dolyar nga salapi nga wala matino ang kantidad.
Dugang ni SPO3 Baay nga sa ilang pakisusi maoy ilang nasayran nga ang duha ka snatcher mipabulhot kini og padagan sa ilang motorsiklo paingon sa reclamation area sa maong dakbayan. (BANATNEWS)