Naghupot og shabu nagtingkagol

CEBU, Philippines - Usa ka 29-anyos nga lalaki nagtingkagol sa Talisay City detention cell   human kini masakping naghupot og ginadiling drugas sa mga polis nga nagpatrolya kagahapon sa mga alas 2:00 sa kaadlawon diha sa south road properties habig sa barangay Cansojong, dakbayan sa Talisay.

Ang suspetsado mao si Herbert Tachado taga barangay San Isidro sa nahisgutang siyudad.

Na-recover nila ni SPO1 Sherwin Abellare, PO3 Renato Pendo ug PO2 Jude Enemecio gikan sa suspetsado ang duha ka paketeng shabu hinungdan sa pagkasikop niini.

Si Tachado ang giingong natagboan sa nahisgutang mga polis nga nagsakay og mountain bike diha sa nahisgutang lugar hinungdan nga ilaha kining gisita ug gipapataas ang t-shirt niini.

Apan kalit nga dunay gikuot nga tulo ka mga gagmay’ng pakete sa tin foil gikan sa iyang bulsa si Tachado dayon giitsa ngadto sa yuta.

Daling gisusi sa mga polis kung unsay giitsa niini ug na-recover sa mga polis ang duha sa tulo sa nahisgutang mga pakete ug nasuta nga shabu diay kini.

Si Tachado nagkanayon nga igo lang siyang gisugo sa pagpapalit sa nahisgutang ginadiling drugas apan wala kini motug-an kung kinsay nagsugo ngadto kaniya. (BANATNEWS)