14 ka mga mananagat nasikop

CEBU, Philippines - Gidakop ang 14 ka mga mananagat nga taga barangay Sabang sa isla sa Olango sa dakbayan sa Lapu-Lapu dihang naaktohan nga nanagat sa kadagatan sa lungsod sa Cordova nga gideklarar nga ubos sa fish sanctuary sa kagamhanan sa maong dakbayan.

Si SPO3 Teofilo Amodia sa kapolisan sa maong lungsod nga nahinabi sa Banat News mibutyag nga ang mga sakop sa Marine Watch nagpatrolya sa kadagatan sa maong dapit.

Ang pagdakop natigayon alas 11:00 pasado sa buntag sa fish sanctuary sa kadagatan sa barangay Hilutungan sa Cordova diin nagkadaiyang matang sa isda ang ilang nakuha nga gibana-banang mokabat ngadto sa 30 ka kilo.

Matud ni SPO3 Amodia nga daghan ang matental sa pagpanagat sa kadagatan sa lungsod sa Cordova ilabi na sa maong dapit nga gideklarar nga fish sanctuary sanglit makita man nga magpanon ang mga isda.

Dugang pa niya nga naaktohan ang maong grupo sa mga mananagat nga nagsakay og pump boat nga namukot sa maong dapit maoy hinungdan nga gidakop.

Hinuon ang maong mga dinakpan dali usab nga nakapangayo og pasaylo kang Mayor Adelino Sitoy kinsa midawat usab niini uban ang higpit nga pagpahimangno sa maong mga dinakpan sa dili na pagsubli sa paghimo sa maong kalapasan.(BDB) (BANATNEWS)