CEBU, Philippines - Gibati na og kabalaka ang paryente sa usa ka Cebuana nga nurse nga taga lungsod sa Consolacion kinsa nabalakang naapil sa na-trap sa nahugnong CTV Building sa Christchurch atol sa nahitabong linog ngadto sa New Zealand niadtong Martes.
Ang maong linog dunay gikusgon nga 6.3 magnitude nga hinungdan sa pagkahugno sa nahisgutang edipisyo.
Si Bevelyn Baisa, 18, nagpuyo diha sa Montery Homes Subdivision, barangay Mohon dakbayan sa Talisay mibutyag kagahapon sa mga tigbalita nga ang iyang ig-agaw nga si Ivy Jane Boholst-Cabonelas, 33, usa sa na-trap sa maong edipisyo.
Matud niya nga ang bana ni Ivy kinsa tua usab ngadto sa New Zealand mitawag sa ilang iyaan nga si Cecelia Ragay, nagpahibawo sa nahitabo nga si Ivy wala na makapauli sa ilang gipuy-an.
Niadtong higayona atol sa linog si Ivy diha nahimutang sa ikatulong andana sa edipisyo nagtambong sa iyang klase aron kini ma-certified nurse sa maong nasud.
Kagahapon sa alas 3:00 sa kaadlawon ang bana ni Ivy mitawag na usab kang Ragay nga wala pa gyud makit-i si Ivy.
Kagahapon sa buntag si Cecelia miadto sa simbahan sa Carmelites sa dakbayan sa Sugbo aron mag-ampo nga unta luwas lang si Ivy.
Samtang pabiling naglaom ang mga kabanay sa lain pang mga Cebuana nga gikabalak-ang napiit usab sa maong edipisyo nga giilang sila si Rhea Mae Sumalpong nga taga Tuyan, Naga ug Emmabelle Anoba nga taga lungsod sa Minglanilla.
Ang maong mga nurse nagtungha sa King’s Education sa maong edipisyo aron unta ma-certify nga nurse sa maong nasud.
Sa report sa TV Patrol Central Visayas kagahapon ilang gipagawas ang mga pangalan sa mga Filipino nga tua sa Christchurch nga mao sila si Ezra Mae Madalle; Jessie Lloyd Redoble; Jewel Francisco (taga Manila); Ma. Luise Amantillo; Valquin Bensurto; Ivy Cabunilas; Rhea Mae Sumalpong; Emmabelle Anoba ug John Kristofer Chua.
Samtang sa susamang report, usa sa mga kabanay ni Sumalpong nagkanayon nga nakadawat siya og text nga aduna nay pito ka mga patay’ng lawas nga gituohang mga Filipino ang naugkat apan wala pa ilha sa mga awtoridad sa New Zealand.
Ang mga kabanay pulos nagmahay sa kahaguka sa Department of Foreign Affairs tungod sa kalangay nila sa paglihok aron makapadala og mga tawo sa maong dapit.
Nasuta nga 95 ka mga tawo ang naugkat nga patay’ng lawas sa mga nahugnong edipisyo sa maong lugar apan wala pay klarong identification ang mga patay’ng lawas. (EIM) (BANATNEWS)