Dunay laing 'suspek' - Comendador

CEBU, Philippines - Adunay bag-ong nadawat nga impormasyon ang Task Force Ellah Joy nga dunay laing responsable sa kamatayon sa 6-anyos nga tinun-an sa Calajoan Elementary School sa lungsod sa Minglanilla nga gidagit ug gipatay niadtong Pebrero 9.

Si Sr. Supt. Patrocinio Comendador, hepe sa Regional Investigation and Detective Management Division (RIDMD) sa Police Regional Office-7 ug tigpamaba sa Task Force Ellah Joy nagkanayon nga bisan paman sa ilang nadawat nga impormasyon magpadayon gihapon sa ilang imbestigasyon sa una nang nasugdan sa Cebu Provincial Police Office (CPPO).

Gipasabot ni Comendador nga ilaha unang paaboton ang desisyon sa provincial prosecutors office diin didto gisang-at sa CPPO ang kaso batok sa gipasanginlang suspetsadong manag-uyab nga sila si Sven Erik Berger ug Karen Castro Esdrelon una pa sila makapangita og laing suspetsado.

Giangkon niini nga bugtong ang pamahayag pa sa mga batang saksi nga una nang mitumbok nilang Berger ug Esdrelon maoy bugtong nilang gihuptang ebidensya nga maoy ilang gihimug-atan sa pagkakarun gawas niini wala na.

Iyang gidugang nga ang ilang gihimo mao ang pagpangita sa dugang mga ebidensya nga ilang ikadugang sa kaso nga gipasaka sa CPPO batok nilang Berger ug Esdrelon.

Apan giklaro ni Comendador ang pagluwat sa katungdanan ni Sr. Supt. Erson Digal isip hepe sa kapulisan sa probinsya dili makaapekto sa dagan sa kaso sanglit ang PRO-7 mao naman ang naghawid sa imbestigasyon.

Matud pa niini nga dili na usab nila iapil si Digal atol unya sa tigum sa tanang naglangkob sa Task Force Ellah Joy sanglit gihulipan siya ni Supt. Teofilo Seclot ang Deputy Provincial Director for Operation (DPDO).   - BANAT NEWS