Volunteer group nagpasakop sa CCRRCC, Rama nalipay

CEBU, Philippines - Mas milig-on ang puwersa sa Cebu City Risk Reduction Coordinating Council nga gipangulohan ni Alvin Santillana tungod sa pagpasakop kanila sa 40 kapin ka mga miyembro sa Seagull Rescue Team.

Sumala pa ni Santillana nga nag-agi og binuwan nga mga trainings ang maong grupo ug duna pud kini nagkadaiyang gamit sanglit kasagaran sa mga sakop niini, gilangkoban sa nurse, engineers ug uban pa.

Nagkanayon ang board member sa Seagull nga si Josep Apayart nga andam sila motabang sa pagresponde sa nagkadaiyang emerhensya nga mahitabo.

Pormal nga miduaw ang mga sakop sa Seagull sa buhatan ni Mayor Michael Rama kagahapon ug mipasalig nga mokooperar sila sa kampanya sa siyudad alang sa dinaliang pagresponde sa bisan unsa nga katalagman nga mahitabo sama sa linog, bagyo, sunog, ug uban pa.

Una na nga gipadayag sa mayor kaniadto nga moumol siya og Quick Response Emergency Team (QRET) nga langkoban sa pipila ka mga sakop sa Marines, kapolisan, Cebu-Emergency Rescue Unit Foundation, Basak-Pardo Emergency Response Team, Barangay Sto.Niño Fire Brigade, Civil Defense, ug uban pang pampubliko ug pribadong ahensiya nga andam motabang sa panahon sa kalamidad o aksidente nga moigo sa bisan asa nga dapit sa Sugbo.  - BANAT NEWS