Digal miduso na sa iyang resignasyon pagka-CPPO director

CEBU, Philippines - Personal nga gitunol ni Cebu Provincial Police Office kon CPPO director Erson Digal ang iyang resignation letter isip director sa CPPO ngadto kang Gov. Gwendolyn Garcia sa buhatan niini alas 3:00 kagahapon sa hapon.

Si Garcia personal usab nga midawat sa resignation ni Digal ug nipahigayon og 20 minutos nga close door meeting uban sa gobernadora ug ni Capitol Consultant Atty. Jose Marie Gastardo.

Gihangop hinuon ni PRO-7 Chief Supt. Ager Ontog Jr. ang lakang nga gihimo ni Digal aron usab malimpyohan ang iyang pangalan.

Kabahin sa performance ni Digal, si Ontog miingon nga kontento ug natagbaw siya sa gipakitang labok sa naulahi human sa pipila ka bulan niining paglingkod tungod kay daghan usab kining nahimong kalampusan.

Si Ontog nagkanayon nga dili pa karun dayon mahimong hulipan sa katungdanan si Digal sanglit ang iyang relinquish letter ipadala pa ngadto sa Campo Crame.

Gikataho nga magbaylo ra sila si Digal ug Sr. Supt. Orlando Ualat ang hepe sa Regional Logistics Division sa PRO-7 isip maoy temporaryong gitudlo nga Officer in Charge (OIC) sa Cebu Provincial Police Office (CPPO) samtang gipaabot kinsay pilion ni Garcia.

Si Digal sa iyang bahin nagdumili na paghatag og komento sa iyang pag-resign apan kini mipasalig nga dili niya biyaan ang imbestigasyon sa pagdagit ug pagpatay kang Ellah Joy Pique.

Miklaro usab siyang limpyo ang iyang konsensya ug wala siya’y gitagoan sa maong kaso.

Samtang si Berger ug Esdrelon nalipay sa desisyon ni Digal nga mobiya nalang sa CPPO ug mipasalamat sa gobernadora ug ingon man sa National Bureau of Investigation (NBI) nga migawas gyud ang kamatuoran nga dili sila maoy mihimo sa krimen.

Midugang ang duha nga gihatagan sa kapulisan sa probinsya og ‘false hope’ ang pamilya ni Pique. Nanghinaot si Esdrelon nga pangitaon sa kapulisan ang tinuod nga midagit ug mipatay sa bata aron mahatagan og hustisya ang pamilya niini kay sila mga inosente sa krimen.

Si Provincial Prosecutor Marlon Atillo miingon nga dili na sila mopahigayong og preliminary investigation sanglit ilaha pang tan-awon ang mga ebidensya sa isig ka habig.

Magpaabot pa usab sila sa komento sa kapolisan kabahin sa gisumitir nga counter-affidavit sa mga suspek.

Mibahad ang mga suspek nga mopasaka sila og kaso batok sa kapolisan ug sa CPPO kung dili pa gihapon sila mabuhian karong adlawa tungod sa kahasol ug kauwaw nga ilang natagamtaman sulod na sa napulo ka adlaw gikan sa ilang pagkasikop.

Ang PRO-7 miumol na og task force nga mohimo og imbestigasyon sa maong krimen nga pangulohan unya ni Sr. Supt. Louie Oppus. (BANAT NEWS)