Wa makiglumba ni joavan pintor gikulata

CEBU, Philippines - Lain na usab nga kontrobersya ang gikalambigitan sa sinagop ni Mayor Socrates Fernandez nga si Joavan human kini pasanginli sa usa ka pintor nga nangulata kaniya niadtong Sabado sa gabii. Segun sa report kagahapon sa buntag sa Buena Mano Balita sa GMA-7 ang biktima giila nga si Casimiro Briones, usa ka car painter, kansang nawong nagsige pa og dugo, baba ug ingon man ang ilong tungod sa bun-og nga iyang nadawat sa pagkulata kaniya sa anak sa mayor.

Si Briones residente sa barangay Candulawan sa dakbayan sa Talisay mitug-an sa Buena Mano Balita nga niadtong Sabado paingon siya sa balay ni Joavan sa Mansueto Subdivision sa barangay Tabunok apan wala maklaro kung asa nga balay ni Joavan iyang adtuon.

Matud ni Briones nagmaneho siya sa motorsiklo ni Joavan samtang ang naulahi nagmaneho usab sa iyang sakyanan nga Sports Utility Vehicle (SUV) diha sa South Road Property (SRP).

Giingong gihagit siya ni Joavan og lumba apan wala siya mosugot niini hinungdan nga gibiyaan siya ug mipasutoy sa pagpadagan. Apan paglabay sa pila ka oras, si Joavan gikatahong nanawag kang Briones ug nagpahibawo nga wala nay problema maong nakahukom ang biktima nga adtuon og balik ang balay ni Joavan aron trabahuon ang sakyanan niini.

Nakugang nalang siya sa iyang pag-abot kalit siyang gikulata ni Joavan. Kagahapong adlawa si Briones wala pa nagpakita sa kapulisan aron i-report ang nahitabo kaniya.

Sa report sa TV Patrol Central Visayas, si Mayor Socrates Fernandez miingon nga adunay prosesong subayon kalabot niining bag-o na usab nga reklamo batok sa sinagop, matud pa niya ilaha kining atubangon. Si Kapitan Dulfo Torregosa sa Candulawan mitug-an sa kapulisan nga niadtong Sabado sa kaadlawon si Briones miduol kaniya ug nagpakisayod unsay iyang buhaton sa motorsiklo ni Joavan sanglit wala man siyay lisensya.

Matud sa kapitan nga iyahang gitudloan si Briones nga dad-on nalang ang motorsiklo ug i-turnover kini sa barangay apan wala motuman niini ang reklamante. - (BANAT NEWS)