Digal palagputon sa CPPO

CEBU, Philippines - Nawad-an na og pagsalig maong nagtinguha si Gob. Gwendolyn Garcia sa pagrelibo kang Cebu Provincial Police Office chief, Sr. Supt. Erson Digal tungod sa giingong pagpamakak ni Digal labot sa imbestigasyon sa gidakop nga suspetsado sa pagdagit ug pagpatay sa 6-anyos nga si Ellah Joy Pique.

Ang CPPO midakop ug mipasaka og kaso batok nila ni Sven Erik Berger nga usa ka Norwegian ug ang Filipina niining pangasaw-onon nga si Karen Esdrelon nga usa ka registered nurse.

Matud pa ni Garcia nga nawad-an na siya og pagsalig kang Digal tungod kay wala siya misulti sa matuod sa resulta dihang iya siyang gisugo sa pagpa-check sa gipanulti nila ni Berger ug Esdrelon nga didto sila sa Waterfront Hotel and Casino sa Lahug ning siyudad dihang nahitabo ang pagdagit ni Ella Joy.

“I have lost my trust and confidence in CPPO director Erson Digal because he withheld information about Ela Joy’s case... he is not trustworthy,” sigon pa sa gobernadora sa pagpakighinabi sa mga sakop sa media.

Ang gobernadora miingon nga naglaraw siya nga marelibohan si Digal.

“Cebu deserves more professional and honest (CPPO) director,” matud pa niini. Si Garcia nakigkita na kang Police Regional Office-7 director Chief Supt. Ager Ontog Jr. kagahapon ug giingong mipahibalo niini nga wala na kini salig ni Digal ug buot na niyang pahulipan.

Gipasabot hinuon ni Garcia nga ang maong desisyon dili tungod sa kapalpakan sa kapolisan sa pagsulbad sa maong kaso kondili pagpadayag lamang sa iyang kapungot nga gilimdan siya ni Digal.

Ang gobernadora nagkanayon nga niadtong nakalabay nga Domingo human madakpi sila si Berger ug Esdrelon sa tugpahanan sa Mactan, personal niyang gimanduan si Digal pagsusi sa pamahayag sa duha nga didto sila sa maong hotel.

Buot ni Garcia nga mokuha si Digal og kopya sa video footage sa CCTV camera sa maong hotel apan matud pa sa gobernador sa pagka-adlaw nga Martes si Digal mi-text kaniya nga wala kini nila makuha tungod kay nagdumili sa pagkooperar ang management sa hotel.

Kini ang hinungdan nga ang gobernadora nagpatabang sa National Bureau of Investigation, ang NBI nakapangayo sa management sa maong hotel sa gipangita ni Garcia.

Nasuko ang sa gobernadora dihang gitug-an sa general manager sa maong hotel nga si Marco Protacio mikooperar gyud sila sa kapolisan dihang miadto kini sa ilang establisamento ug gitanyagan paghatag og kopya sa video footage.

Dugang pa sa gobenadora nga wala siya magduda sa katakos sa kapolisan sa lalawigan ug usa lamang ka tawo, nga ang gipasabot mao si Digal, ang iyang gikahiubsan ug nawagtangan sa iyang pagsalig.

Si Digal dihang gikahinabi sa Banat News mibutyag nga gihimo lang sa CPPO ang ilang trabaho ug ang NBI makahimo og linaing imbestigasyon ug miangkon kining aduna silay kopya sa maong video footage nga gipagawas apan wala nila gipagawas sa media.

Gibarugan ni Digal nga lig-on ang ilang ebidensya ug testimonya sa mga bata nga positibong mitumbok sa duha nga maoy misignit kang Pique ug aduna pay dugang testigo nga miduol kanila batok sa duha.

Giangkon hinuon ni Digal nga naapektahan sila sa ‘public opinion’ ug silang milihok maoy naapektahan.

Nagdumili usab sa pagkomento si Digal sa pamahayag ni Garcia nga nawad-an na kini og pagsalig kaniya ug buot na siyang pailisan.

Ang manlalaban sa mga akusado nga si Salvador Solima nanghinaot nga desisyonan na sa Provincial Fiscal’s Office ang kaso sa iyang mga kliyente karong ang NBI nakapakita og ebidensyang inosente ang duha.

Kagahapon misumitir na sa counter-affidavit ang kampo sa mga akusado ug naglaom si Solima nga makagawas na karong adlawa ang iyang mga kliyente.

Si Berger sa iyang bahin nagkanayon nga bisan og i-clear sila sa kaso mangayo gihapon sila og seguridad sa kapolisan tungod sa kabalaka sa ilang seguridad ug ang tinuoray nga mipatay kang Ellah Joy wala pa madakpi.(EIM)   - (BANAT NEWS)