Gwen naglagot sa sikyu

CEBU, Philippines - Gipatawag ni Gobernador Gwendolyn Garcia ang mga opisyales sa Mustang Security Agency ang security agency nga nagbantay sa Mactan Cebu International Airport Authority (MCIAA) sa milabay’ng adlaw.

Kini human makadawat og reklamo ang gobernador gikan sa pipila ka mga turista kalabot sa dili maayong pagtratar kanila sa pipila ka mga security guard sa MCIAA.

Apan mismo si Gobernador Garcia nakasaksi gyud nga usa ka lady guard sa maong tugpahanan walay batasan dihang may higayong didto ang gobernador sa tugpahanan.

Gituyo sa gobernador nga masayran sa mga opisyal sa maong ahensya ang matang sa kinaiya ug pamatasan sa ilang mga guwardiya nga gidestino sa tugpahanan sa Mactan nga makapagan ug makadaot sa dungog sa maong ahensya.

Matud pa sa gobernador nga dili siya gusto nga gumikan lang sa walay maayong pamatasan sa mga security guard sa tugpahanan, madaot usab ang dungog sa lalawigan sa Sugbo.

Kini tungod kay ang Sugbo maoy numero uno sa tibuok nasud nga suroyanan sa mga lokal ug langyaw nga mga turista nga nakatabang og dako sa pagpalambo sa ekonomiya sa lalawigan.

Sa maong tigum ang gobernadora mimando sa mga opisyal sa maong ahensya nga ipatarung ang pag-asikaso sa mga bisita ilabi na sa mga turista nga maoy sagad nga costumer sa MCIAA.

Hinuon si Benjie Luya, ang Senior Operations Manager sa nahisgutang security agency mipasalig sa gobernadora nga mopahigayon sila og orientation seminar alang sa ilang mga security staff ilabi na sa mga nadestino sa MCIAA. (BANAT NEWS)