CEBU, Philippines - Usa ka rig operator gipusil patay sa wala hiilhing kriminal samtang kini naglakaw padulong sa ilang balay sa dalan Espolliarium, sitio Pasong Kabayo, sa barangay Duljo-Fatima ning dakbayan sa Sugbo sa miaging gabii.
Ang biktima mao si Antonio Laresma, 25, kansang ulo, dughan ug buko-buko maoy nasabak sa mga bala nga maoy gituohang hinungdan sa hinanali niyang kamatayon.
Ang kapolisan naglisod sa pagsulbad sa maong kaso tungod kay walay mga molupyo nga nakabutyag sa ngalan sa mamumuno.
Apan ang mga silingan sa biktima mibutyag nga hingulata kuno ang biktima sa iyang asawa, hinungdan nga gibiyaan kini sa naulahi dili pa dugay.
Didto sa dapit diin mibay-ad nga wala nay kinabuhi ang biktima, nakapunit ang kapolisan og mga kabhang sa bala sa .45 kalibreng pistola.
Gituohan sa kapolisan nga atraso o kontra sa biktima ang mipatay kaniya. (Niña Sumacot sa The Freeman, Wen Celen (BANAT NEWS)