Konsehal nasubo kay wa suportahe sa mga kauban
CEBU, Philippines - Si Konsehal Danny Caballero sa oposisyon sa konseho sa dakbayan sa Talisay gibati og kasubo kay ang iyang gidusong resolusyon nga magsuporta sa kamandoan ni Presidente Ninoy Aquino sa pag-ban sa pagpamutol og kahoy kuwang sa suporta sa iyang mga kaubanan sa konseho.
Si Caballero kinsa maoy vice chairman sa Committee on Agriculture and Aquatic Resources miduso sa Resolution No. 2011-06-7 atol sa ilang regular nga sesyon niadtong Martes sa miaging semana.
Ang maong resolusyon hugtanong nagsuporta sa Executive Order No. 23 ni Aquino nga nagdeklara og moratorium kun pagpahunong sa pagpamutol sa mga kahoy nga nanurok sa natural ug residual forest.
Gani agi og pagpalig-on sa maong balaod, gitukod sa Pamuno nasud ang anti-illegal logging task force isip implementing arm o grupo nga gitahasan sa pagsikop ug pagsilot sa malapason.
Ang maong resolusyon ni Caballero gipasa una ngadto sa committee on Environment and Laws tungod kay giingong nakasabod kini sa gidusong ordinansahon.
Apan si Caballero miinsister nga walay dautan kung ang iyang mga kauban sa konseho mosuporta sa panawagan sa presidente.
Matud niya nga ang maong lakang alang sa kaayohan sa siyudad kay ang kahoy gikinahanglan kaayo aron mapugngan ang baha inig bunok sa uwan.
Gipasabot ni Caballero nga ang tuyo niya mao nga mahunong ang pagpamutol og kahoy sa kalasangan sa Talisay ilabi na nga ang maong lugar gitawag nga usa ka landslide prone area kun dahilianan og yuta. (BANAT NEWS)
- Latest
- Trending
