Hepe sa Talisay police girelibohan

CEBU, Philippines - Ang hepe sa Talisay City Police Station (TCPS) nga si Superintendent Henry Biñas nagparelibo sa katungdanan human siya pasanginle nga nanghinol sa usa ka babayeng reporter sa Cebu Daily News.

Si Biñas nga nahinabi sa Banat News kagahapon mibutyag nga niadtong Pebrero 16, 2011 mihangyo siya sa hepe sa Cebu Provincial Police Office (CPPO) Senior Superintendent Erson Digal nga magparelibo siya isip hepe sa TCPS.

Matud ni Biñas nga niadtong Pebrero 18, 2011 migawas ang iyang relieve order gikan sa CPPO.

Giangkon sa hepe sa TCPS nga bug-at ang pasangil batok kaniya ug nakapaapektar kaayo kini sa iyang dungog ug pagkatawo, labaw na sa iyang katungdanan

Si Biñas midugang nga dili siya buot nga kung dunay mahitabong mga insidente sa Talisay usa siya sa mabasol tungod kay wala na niya kini maatiman.

Ang kasong administratiba batok kang Biñas nasang-at na ngadto sa buhatan ni Chief Superintendent Ager Ontog, hepe sa Police Regional Office (PRO)- 7 ug karon gipaubos na siya sa imbestigasyon.

Kahinumdoman usab nga ang maong pasangil daan nang gihimakak ni Biñas.

Si Senior Superintendent Erson Digal, hepe sa CPPO nga nahinabi sa Banat News kagahapon mibutyag nga si Biñas mitunol og resignation letter ngadto kaniya niadtong Pebrero 16, 2011 nga nagpasabot nga moluwat na siya sa iyang pwesto isip hepe sa Talisay police.

Matud ni Digal nga buot ni Biñas nga maka-focus kini sa kasong gipasaka batok kaniya karon.

Niadtong Huwebes sa milabay’ng semana si Digal migama og suwat alang kang Mayor Socrates Fernandez aron ang mayor mapahibawo nga magparelibo na sa pwesto si Biñas.

Niadtong Biyernes ang maong suwat gipadala ni Digal ngadto sa buhatan sa mayor ug diha-diha girelibohan dayon si Biñas sa katungdanan.

Matud ni Digal nga sa pagkakaron si Senior Inspector Errol Francis Deveyra, ang deputy chief sa TCPS mao una ang officer in charge samtang nangita pa siya og ipuli nga hepe.

Si Arturo Bas, Public Information Officer sa dakbayan sa Talisay nagkanayon nga posibleng malakip og tuki karong adlawa (Lunes) sa department head meeting ang nahisgutang pagparelibo ni Biñas. (BANAT NEWS)