Ellah Joy gilubong

CEBU, Philippines - Gihatud na ngadto sa katapusang pahuwayan kagahapon sa sam-ang sa barangay Pardo, dakbayan sa Sugbo ang 6-anyos nga si Ellah Joy Pique kinsa gidagit ug gipatay.

Hangtud karon wala pay kasigurohan ang hustisya sa kamatayon niini bisan paman aduna nay duha ka mga tawong gisikop ug gipasakaan og kaso tungod kay nagkadaghan usab ang misuporta sa mga gitumbok nga suspek.

Ang sakyanan diin gisakay ang lungon nga gisudlan sa patayng lawas sa bata dunay gibitay nga 14 ka mga posters diin gisuwat ang pagpangayo nila sa hustisya.

“Jail the killer, protection of school children,” maoy usa sa nasuwat sa nahisgutang mga posters.

Sa mga ala- una sa hapon gisugdan ang Santos nga Misa kinsa si Padre Eliseo Gaballo maoy misaulog niini.

Sa homiliya si Padre Gaballo nagkanayon nga dili ibutang sa kasing-kasing ug kamot ang pagpanimalos tungod kay ang Ginoo lang ang dunay katungod nga mosilot sa mga makasasala.

Matud ni Gaballo nga makaluluoy kaayo si Ellah Joy kinsa nabiktima sa mga tawong ang makabuhat lamang mao ang yawa.

Giawhag niini ang katawhan nga mag-ampo alang sa kalag sa bata aron maadto kini sa langit ug hikapon niini ang mga kasingkasing sa mga mamumuno nga motahan.

Kahinumduman nga si Ellah Joy gidagit gawas sa ilang eskwelahan ug gipatay ug ang iyang patay’ng lawas napalgan na lang kini ngadto sa lungsod sa Barili kapin usa ka semana na ang nakalabay. (BANAT NEWS)