Demolition order pirmado na

CEBU, Philippines - Hingpit na nga gipirmahan ni Mayor Jonas Cortes ang demolition order aron sakwaton ang mga balay nga nahimutang sa danger zone area sama sa kasapaan ug kadalanan sa dakbayan sa Mandaue.

Gipasubay niya ang maong kamandoan sa Republic Act 7279 kon Urban and Housing Development Act of 1992 ilabi na sa Section 28 nga nagbatbat , “Evection or Demolition; however may be allowed when persons or entities occupy danger zone areas.

Naglakip nga mga dapit nga danger zone area ubos sa RA 7279 mao ang mga esteros, mga relis, labayanan sa basura, mga tampi sa sapa, baybayon, agianan sa tubig, ug uban pang publikong lugar nga naglakip sa mga sidewalk ug playground.

Sa maong demolition order ni Mayor Cortes nga gisumiter ngadto sa   buhatan sa Housing on Urban Development Office (HUDO) ang pito ka barangay sa dakbayan nga may mga balay nga gipanukod sa mga tampi sa kasapaan.

Si Emmanuel Arong sa HUDO mihingalan sa mga barangay kansang molupyo anaa sa makuyaw’ng dapit sama Subangdaku, Banilad, Maguikay, Centro, Paknaan, Guizo, Mantuyong, Ibabao ug barangay Tipolo.

Nunot sa maong kamandoan ni Mayor Cortes lakip usab sa pagdemolis ang mga tindahan nga nahimutang sa mga sidewalk sa maong lugar ug lakip na usab ang mga dalan nga gihimong shop sa motorsiklo sa pipila ka mga tindahan og piyesa sa mga sakyanan. (BANAT NEWS)