Nagkulang ang trak sa basura sa dakbayan

CEBU, Philippines - Gipahibalo ni Konsehal Nida Cabrera nagkanihit gyud ang trak sa basura sa siyudad gumikan kay sa 20 kapin ka mga trak sa Department of Public Services (DPS),15 na lang ang nagdagan karon gumikan kay nangaguba na ang ubang unit.

Matud pa sa konsehal nga gawas sa nangaguba nga mga garbage truck sa DPS, duna pu’y mga gubaon nga mga garbage truck sa mga barangay busa gikinahanglan gyud mopalit ang siyudad .

Gumikan nini, mas gipalig-on pa karon ang puwersa sa barangay environment officers (BEO) kinsa motambayayong sa pag-edukar sa katawhan nga ilabay ang ilang mga basura sa saktong oras aron dili kini magpasad sa kadalanan samtang nagpaabot sa trak sa basura.

Kasamtangan pa karon nga giproseso sa siyudad ang pagpalit og walo ka compactor garbage truck.

Bisan pa man niini, padayon nga nag-awhag si Cabrera sa publiko nga kung mahimo i-recycle ang mga basura aron mominos na ang basura nga malabay sa Inayawan landfill nga tak-opan na sa dili madugay gumikan sa kapuno na niini.

Kasamtangan karon nga nangita ang siyudad og bag-ong dapit aron himuong bag-ong labayanan sa basura ug usa sa ilang gipilian mao ang usa ka dapit sa Consolacion nga nagtangag sa presyo nga P500,000 ngadto P700,00 matag metric ton sa basura.

Makatabang usab   sa pagminos sa basurahan mao ang mga shredder machines diin ang basura nga magaling niini himoon usab nga fertilizer ug sa susamang higayon, makakuha og income ang barangay. (BANAT NEWS)