Tulo ka drug suspects sa Mandaue naposasan

CEBU, Philippines - Tulo ka tawo nga gikatahapang pusher ang nadakpan sa buy bust operation sa mga sakop sa City Anti Illegal Task Force (CAIDSOTF) sa Mandaue City Police Office (MCPO) alas- 5 pasado ang takna sa hapon niadtong miaging adlaw sa dakbayan sa Mandaue.

Ang unang nadakpan mao si Christopher Baclohan, panuigon nga nagpuyo sa barangay Umapad sa maong dakbayan kinsa nakuhaan og usa ka paketeng gidudahang shabu.

Dugang nadakpan mao ang managsuon nga sila si Glenn Paras, 31, kinsa nakuhaan og duha ka pakete ug giapil sa pagsikop ang igsuon niini nga si George Paras, 32, kinsa diha sa balay nga gituohang suyopanan.

Ang team sa CAIDSOT sa kapolisan sa maong dakbayan nga gipangulohan ni Insp. Henry Bancolita maoy nakasikop sa mga suspetsado sa buy bust operation nga ilang gihimo.

Si Bancolita miingon nga ang buy bust ilang gisentro kang Glenn Paras sa nahisgutang dapit human usab sa pipila ka adlaw nilang pagpaniid sa ilegal niining kalihukan.

Ang kasong kalapasan sa Republic Act 9165 kun Comprehensive Dangerous Drug Act of 2001 ang gipasaka sa kapolisan batok sa maong mga gikatahapan. (BANAT NEWS)