Restaurant gitulis
CEBU, Philippines - Milampos ang duha ka tulisan sa pagtulis sa usa ka restaurant nga nahimutang sa A. Soriano St. barangay Centro dakbayan sa Mandaue sa milabay’ng gabii.
Ang gitulis mao ang AA BBQ diin ang cashier niini mao si Maricel Wayoy, 23, kasamtangang nagpuyo sa maong restaurant.
Matud pa ni Wayoy, mga alas 10:25 sa milabay’ng gabii samtang nangandam na sila sa pagsira sa maong restaurant, duha ka tawo ang kalit nga misulod dayong tion sa dala niining mga armas mobuto.
Si Wayoy gitionan og kalibre .45 samtang ang gwardiya nga si Primo Nazareno gipahapa ug gitionan sa usa ka gituohang KG-9 human kini naunhi sa mga tulisan.
Daling gikuha sa mga tulisan ang kwarta sa kaha nga mokabat sa P33 mil nga halin sa maong kan-anan nianang adlawa ug nangikyas luwan sa usa ka XRM nga motorsiklo nga walay plaka.
Si PO1 Jesson Estrera sa Presinto 1 sa Mandaue City Police Office miingon nga gidis-armahan sa mga tulisan ang gwardiya sa iyang .38 kalibreng rebolber.
Ang mga tulisan anha misibat padulong sa Cebu International Convention Center ug wala na maabti pa sa mirespondeng mga sakop sa kapolisan. (BANAT NEWS)
- Latest
- Trending
