Way ebidensiya sa laptop ni Berger

CEBU, Philippines - Naablihan na sa mga sakop sa kapolisan ang laptop nga gipanag-iya ni Sven Erik Berger nga usa sa mga suspek sa pagdagit ug posibleng sa pagpatay sa 6-anyos nga si Ellah Joy Pique sa Minglanilla kinsa patay nang napalgan niadtong milabay’ng semana sa Barili.

Ang abogado ni Berger ug sa uyab niining si Karen Esdrelon nga Salvador Solima sa pakighinabi sa mga tigbalita nagkanayon nga walay law-ay nga hulagway o ba kaha mga hulagway diha sa laptop sa iyang kliyente nga magamit isip ebidensya sa mga polis.

Duha ka oras human sa pag-abli sa technician sa kapolisan sumala pang Solima walay nakitang magamit ang mga polis busa naglaraw siyang mo-file og habeas corpus karong adlawa aron pabuhian ang iyang mga kliyente.

Giklaro hinuon ni Solima nga boluntaryo gyud nga gipaablihan sa manag-uyab ang ilang laptop aron masuta nga wala gyud silay gitago-an.

Uban sa miabli sa maong laptop mao ang usa ka IT expert, ang imbestigador nga si SPO1 Kenneth Abella, si Atty. Solima ug ang mga suspek.

Si Solima nagkanayon nga hayan sa adlaw’ng Lunes motubag na sila sa kaso pinaagi sa pagpagawas og counter affidavit. (BANAT NEWS)