CEBU, Philippines - Nadakpan ang usa ka giingong hitman sa usa ka fraternity nga gipasanginlang nangilkil ug mihulgang patyon ang pamilya sa negosyante diha sa Villagonzalo sa barangay Tejero ning dakbayan kagahapon.
Ang gidakop giilang si Gerdy Sianson, 25, kinsa una nang gireklamo sa tag-iya sa usa ka turbo parts shop nga kanunay niyang kilkilan og kwarta. Apan kagahapon sa buntag nadakpan siya sa grupo nila ni Chief Insp. Michael Bastes, ang hepe sa Fuente Osmeña Police Station.
Si Bastes mibutyag sa mga tigbalita nga ilang gipangita niadtong Miyerkules sa buntag si Sianson human makadawat og tawag gikan sa tag-iya sa maong turbo parts shop sa barangay Pari-an nga iyahang higala ug mireklamo kabahin sa pagpangilkil sa suspek.
Ang reklamante kansang pangalan gipugngan ni Bastes tungod sa kahadlok sa iyang seguridad mipasangil nga dugay nang magpunay og pangilkil ang suspek kanila ug lakip na sa iyang mga trabahante ug niadtong adlawa nangayo kini og P6,000 nga nagdala og granada ug Ingram submachine pistol.
Sumala pang Bastes gihulga niini nga pabuthan og granada ang maong negosyante lakip na iyang pamilya ug ang napulo niya ka mga trabahante nga niadtong tungura nagtrabaho.
Human makadawat si Bastes sa tawag sa iyang higala gimandoan niya kini nga dili pahatagan ang suspek kay anhaon nila kini dayon apan tungod sa kagrabe sa traffic nalangay si Bastes hinungdan sa napugos nalang sa paghatag ang negosyante og P5,000 sa suspek.
Nianang pagka-alas 11 sa gabii sa samang adlaw subling nanawag ang negosyante kang Bastes tungod kay mibalik ang suspek ug mi-hostage sa lima niya ka trabahante. Human makuha ang ilang kwarta ug cellphones dali kining mibiya ug misakay og taksi.
Inabagan sa duha ka mga police asset nasundan sa kapolisan ug sa biktima ang suspek diha sa Villagonzalo ug dihang ilang nababagan ang taksi daling naablihan ni SPO4 Mario Revilla ang pultahan tungod sa gilingkuran sa suspek ug dali kining nationan sa ulo dihang gi-cock niini ang Ingram.
Tungod niini daling gilayog ang suspek sa mga polis ug nadisarmahan ug nasuta nga duha ray bala sa Ingram ug ang granada gibugkos og tape maong wala kini makagamit niini. Nakuhaan usab kini og shabu.
Matud pang Bastes dihang ilang gisukit-sukit ang suspek kini miangkong nakapatay na og unom ka tawo. Dunay duha ka bag-ong kasong murder nga gipasaka batok kang Sianson.
Usa ka Salvacion Sumilhig, asawa sa gipatay ni Sianson nga si Delfin miingon nga gipatay ang iyang bana niadtong Abril sa milabay’ng tuig tungod sa personal nga panagbangi.
Kasong five-counts robbery, illegal possession of firearms and ammunitions and explosives, possession of illegal drugs ang gipasaka batok kang Sianson kagahapon. (BANAT NEWS)