Nagdala'g pusil debomba tiklo

CEBU, Philippines - Tulo ka tawo, usa na niini menor de edad ang nasikop sa kapolisan kay nagdala og mga pusil de bomba nga balahanan og holen didto sa Vista Grande Subdivision, sa barangay   Bulacao, dakbayan sa Talisay sa miaging udto.

Ang mga suspetsado mao sila si Albert Callino, 19, Jason Cabriana, 18, ug usa ka 14-anyos nga bayong-bayong, nga pulos taga Sitio Sambagan, barangay Lagtang sa nahisgutang dakbayan.

Ang maong mga suspetsado nasikop nila ni SPO3 Sherwin Abellare ug PO3 Renato Pendo.

Naimbargo gikan sa mga suspetsado ang tulo ka improvised air rifle, 23 ka holen nga bala, ug duha ka gagmay’ng plastic container nga dunay mga sulod nga alcohol nga gamiton sa pagpabuto sa maong mga de bomba.

Ang mga residente sa maong lugar taud-taud nang nagreklamo bahin sa mga batan-ong mosulod sa ilang subdivision nga magdala og mga de bombang ripli nga gamiton sa pagpamusil og langgam.

Ang mga residente sa subdivision nabalaka nga ang maong mga batan-on makaigo ug makadisgrasya unya og mga tawo.

Kagahapon sa buntag ang magtiayong Robert, 49 ,ug Mitus Legaspi, 48, mga residente usab sa nahisgutang subdivision maoy miduso og kasong kalapasan sa Akta Republika 8294 kon “illegal possession of firearms”. (BANAT NEWS)