PRO7 midepensa sa kapolisan
CEBU, Philippines - Gidepensahan sa kadagkoan sa Police Regional Office-7 ang kapolisan sa probinsya kalabot sa gipasakang kaso niini batok sa usa ka Norwegian National ug sa hinigugma niining Pinay sa kasong pagdagit ug pagpatay kang Ellah Joy Pique.
Si Sr. Supt. Patrocinio Comendador sa Regional Investigation and Detective Management Division (RIDMD) nagkanayon nga ang gibasihan sa kapolisan sa pagpasaka og kaso nga Special Complex Crime of Kidnapping with Homicide nila ni Sven Erik Berger ug Karen Castro Esdrelon mao ang testimoniya sa tulo ka bata kinsa positibong miila ug mitumbok kanila nga maoy responsabli sa pagdagit kang Pique.
Ang pamahayag ni Comendador gihimo agi og reaction sa misibaw nga mga pagduda nga posibleng nasaypan lang ang mga suspek.
Apan matud ni Comendador nga ila nalang huwaton ang desisyon sa piskaliya kinsa maoy motimbang-timbang sa mga ebidensya nga ilang gisang-at batok sa mga sinumbong.
Si Berger ug Esdrelon nagplanong makakuha og waiver of detention aron dili sila matanggong sa bilanggoan.
Matud ni Comendador mas maayo usab nga buhaton kini sa mga sinumbong aron makahimo pa silang kapolisan sa pagpangapkap og dugang mga ebidensya batok sa duha.
Sa iyang bahin si Supt. Eduardo Saavedra, Deputy Provincial Director for Administration (DPDA) atol sa Talakayan sa Isyung Pulis (Tsip) Forum kagahapon nagkanayon nga sila mismo dili kombinsido nga sila si Esdrelon ug Berger ang nagpatay sa batang si Pique. (BANAT NEWS)
- Latest
- Trending
